पुस्तक प्रकाशक-विक्रेत्यांची बैठक बारगळली

साहित्य महामंडळाच्या विरोधातील प्रकाशक, ग्रंथविक्रेत्यांची बैठक बारगळली
प्रतिनिधी
महाबळेश्वर येथील अखिल भारतीय मराठी साहित्य संमेलनात महामंडळाच्या विरोधात दंड थोपटून उभ्या राहिलेल्या काही प्रकाशक आणि ग्रंथविक्रेत्यांनी एप्रिल महिन्यात बैठक घेण्याचे ठरवले होते. मात्र एक महिना उलटून गेला तरी अद्याप अशा प्रकारची कोणतीही बैठक झालेली नाही. तर महामंडळावर प्रकाशक आणि ग्रंथविक्रेते यांना प्रतिनिधीत्व देता येणार नाही, घटनेत तशी तरतूद नाही, असे अखिल भारतीय साहित्य महामंडळाचे अध्यक्ष कौतिकराव ठाले-पाटील यांनी सांगितले.
साहित्य संमेलनाच्या ठिकाणी पुस्तक प्रकाशक व ग्रंथविक्रेत्यांसाठी स्टॉल्स मांडण्यात येतात. मात्र त्या ठिकाणी अनेक गैरसोयी असतात, स्टॉल्सची रचना योग्य प्रकारे नसते, व्यवस्थेत काही त्रुटी असतात, असे आक्षेप प्रकाशक सुनील मेहता, ‘अक्षरधारा’या पुस्तक प्रदर्शन आयोजित करणाऱ्या संस्थेचे रमेश राठीवडेकर यांच्याकडून महाबळेश्वर येथे घेण्यात आले होते.
तसेच साहित्य महामंडळावर प्रकाशक आणि विक्रेते यांच्या दोन प्रतिनिधींना घेण्यात यावे, अशी मागणीही मेहता व राठीवडेकर यांनी पत्रकारांशी बोलताना केली होती. यासाठी आपण लवकरच महामंडळाला निवेदन सादर करणार असून महामंडळाच्या कार्यपद्धतीबाबत चर्चा करण्यासाठी एप्रिल महिन्यात पुण्यात सर्व प्रकाशक आणि ग्रंथविक्रेत्यांची बैठक आयोजित करण्यात येईल, असेही मेहता यांनी जाहीर केले होते.

मात्र एप्रिल महिना गेला आणि आता मे महिनाही संपत आला तरी अशी बैठक झालेली नाही. त्यामुळे ही बैठक का बारगळली आणि ती आता कधी होणार त्याकडे प्रकाशक आणि विक्रेत्यांचे लक्ष लागले आहे.
दरम्यान या संदर्भात अखिल भारतीय साहित्य महामंडळाचे अध्यक्ष कौतिकराव ठाले-पाटील यांच्याशी संपर्क साधला असता, त्यांनी सांगितले की, प्रकाशक किंवा ग्रंथविक्रेत्यांकडून महामंडळाला कोणतेही निवेदन अद्याप प्राप्त झालेले नाही. महामंडळावर प्रकाशक किंवा ग्रंथविक्रेत्यांना प्रतिनिधीत्व देण्याची कोणतीही तरतूद घटनेत नाही. असे पत्र आले तर त्यावर महामंडळाच्या बैठकीत चर्चा केली जाईल. प्रकाशक किंवा ग्रंथविक्रेत्यांना महामंडळाच्या ज्या घटक संस्था आहेत, त्यांच्यामार्फत महामंडळावर प्रतिनिधीत्व मिळू शकते.
तर सुनील मेहता व रमेश राठिवडेकर यांच्याशी भ्रमणध्वनीवर वारंवार संपर्क साधूनही ते प्रतिक्रियेसाठी उपलब्ध होऊ शकले नाहीत.