मनपा करणार औषधी झाडांची लागवड

महापालिका करणार औषधी झाडांची लागवड
प्रतिनिधी
मुंबईतील वाढते प्रदूषण कमी करण्याच्या उद्देशाने आणि पर्यावरणाला पोषक ठरतील, अशा आयुर्वेदिक झाडांची मोठय़ा प्रमाणात लागवड करण्याचा निर्धार बृहन्मुंबई महानगरपालिकेने केला आहे. पावसाळ्यात एक रुपया इतके नाममात्र शुल्क घेऊन मुंबईकरांना रोपांचे वाटप करण्यात येणार असून यंदा एक लाख रोपांचे वाटप करण्यात येणार आहे, अशी माहिती महापालिका आयुक्त डॉ. जयराज फाटक व महापौर डॉ. शुभा राऊळ यांनी बुधवारी पत्रकार परिषदेत दिली.
२००९-१० या आर्थिक वर्षासाठी वृक्ष प्रश्नधिकरणासाठी ६० कोटी रुपयांची तरतूद करण्यात आली आहे. मुंबईतील मोकळ्या जागा, गृहनिर्माण संस्था तसेच अन्य ठिकाणी अडुळसा, नागकेशर, कोरफड, तुळस, आवळा, हिडा, बेहडा, आदी औषधी झाडे मोठय़ा प्रमाणात लावण्यात येणार आहेत. त्यासाठी केंद्र शासनाकडून १० कोटी रुपयांची मदत मागण्यात आली आहे, असे आयुक्त म्हणाले.
मुंबईत दरवर्षी वृक्षारोपण करण्यात येते. ती झाडे विशेष करून मोकळ्या जागी लावण्यात यावीत, रस्त्याच्या कडेला झाडे लावण्यात येऊ नयेत. कारण येथे लावलेली झाडे जगण्याचे प्रमाण कमी आहे. झाडे वाढली तरी नंतर ती कापावी लागतात. झाडे आणि पक्षी यांचा परस्पर संबंध असून पालिकेने ‘हरित क्षेत्रा’तील झाडांवर पक्ष्यांसाठी निवारे बांधावेत, अशी सूचना महापौरांनी या वेळी केली.
मुंबईत १९ लाख १७ हजार झाडे अस्तित्वात असून गेल्या पाच वर्षात झाडांच्या संख्येत सात लाखांनी वाढ झाली आहे. मुंबईत दोन लाख ४१ हजार अशोकाची, एक लाख ७४ हजार नारळाची, एक लाख आठ हजार आंब्याची तर एक लाख ५९ हजार सुबाभुळाची झाडे असल्याची माहिती पालिका आयुक्तांनी या वेळी दिली.
जाहिरातीचे फलक लावण्यासाठी अनेकदा झाडांची कत्तल केली जाते, अशी कत्तल करणाऱ्यांवर कठोर कारवाई केली जावी, अशी मागणीही महापौरांनी या वेळी केली. महापालिका यंदा पावसाळ्यात रोपांचे वाटप करणार आहे. या रोपांबरोबर पालिकेने नाममात्र शुल्क आकारून खत व मातीही द्यावी, अशी सूचना महापालिकेच्या बाजार व उद्यान समितीचे अध्यक्ष कुमार पांडे यांनी या वेळी प्रशासनाला केली.