असंभवमध्ये दिलीप प्रभावळकर

असंभव’मध्ये प्रभावळकर'
मुंबई, १५ मार्च / प्रतिनिधी
झी मराठीवरील ‘असंभव’ या मालिकेत आता लवकरच अभिनेते दिलीप प्रभावळकर एका भूमिकेद्वारे प्रेक्षकांसमोर येत आहेत. काही वर्षांपूर्वी झी मराठीवर प्रसारित झालेल्या ‘श्रीयुत गंगाधर टिपरे’ या मालिकेतील दिलीप प्रभावळकर यांची ‘टिपरे आजोबा’ ही भूमिका खूप गाजली होती. आता दीर्घ कालावधीनंतर प्रभावळकर हे पुन्हा छोटय़ा पडद्यावर परतत आहेत.‘असंभव’ मालिकेत प्रभावळकर एका नव्या भूमिकेत दिसणार असून त्यांची ही भूमिका मालिकेतील अनेक असंभव गोष्टी संभव करून दाखवणार आहेत. ‘असंभव’मालिकेने सहाशे भागांचा टप्पा पार केला असून मालिकेचे कथानक एका गूढ वळणावर येऊन थांबले आहे. ‘असंभव’ मालिकेत लवकरच प्रभावळकर हे या भूमिकेद्वारे दाखल होत आहेत. ते जे पात्र रंगवत आहेत, त्याची पूर्वसूचना मालिकेतील सुलेखाला मिळते. त्यामुळे ती अस्वस्थ झालेली आहे. त्यामुळे आता पुढे काय घडणार त्याचा उलगडा लवकरच मालिकेत होणार आहे.