सारडा समान संधी पुरस्कार

कांचन परुळेकर यांना सारडा समान संधी पुरस्कार
‘स्वयंसिद्धा’ च्या माध्यमातून हजारो महिला, मुले आणि मागासवर्गीयांना रोजगार
मुंबई, १३ मार्च / प्रतिनिधी
सारडा समान संधी फाऊंडेशनतर्फे देण्यात येणाऱ्या २००८ या वर्षीच्या सारडा समान संधी राष्ट्रीय पुरस्कारासाठी कोल्हापूर येथील ‘स्वयंसिद्धा’ या संस्थेच्या संचालिका कांचन परुळेकर यांची निवड करण्यात आली आहे. फाऊंडेशनचे मुख्य कार्यकारी अधिकारी हेमंत शिंगणे यांनी गुरुवारी मुंबईत पत्रकार परिषदेत याची घोषणा केली.
सात लाख एक्कावन्न हजार रुपये, सन्मानचिन्ह आणि सन्मानपत्र असे या पुरस्काराचे स्वरूप असून येत्या १६ मार्च रोजी मुंबईत माजी मुख्यमंत्री विलासराव देशमुख यांच्या हस्ते पुरस्कार वितरित करण्यात येणार आहे. चर्चगेट येथील इंडियन र्मचट्स चेंबरच्या वालचंद हिराचंद सभागृहात सायंकाळी सहा वाजता हा समारंभ होणार आहे.
कोल्हापूर, राधानगरी या शहरी विभागाबरोबरच मल्लेवाडी, सारोळी, बुजवणे, शिरसे, सातवे, माजगाव आदी ग्रामीण विभागातील सुमारे २७ हजारांहून अधिक महिला, मुले आणि मागासवर्गीयांना रोजगाराची संधी उपलब्ध करून त्यांना परुळेकर यांनी स्वावलंबी केले आहे. त्यांच्या या कार्याबद्दल त्यांना हा पुरस्कार जाहीर झाला आहे.
महिलांचे महिला उद्योजक, प्रशिक्षक, प्रशिक्षणार्थी, स्वयंसेवक असे गट तयार करून प्रत्येक गटासाठी त्यांच्या संस्थेतर्फे कार्यशाळा आयोजित करण्यात येतात. विशेष बाब म्हणजे शासकीय मदत किंवा अनुदानापासून त्या दूर राहिल्या आहेत. ही मदत न घेता बचतगटापासून सामुदायिक शेती, ससेपालन, कुक्कुटपालन आदी पशुसंवर्धन व्यवसायात त्यांनी महिलांना कार्यरत केले आहे. गृहोपयोगी वस्तू तयार करून त्याची विक्री करण्यापर्यंतचे प्रशिक्षण त्यांनी या महिलांना दिले असल्याचे शिंगणे यांनी सांगितले.
स्वानंद सखी फिचर्स, स्वयंप्रेरिका महिला सहकारी औद्योगिक संस्था, आरोग्यम धनसंपदा, मार्गदिपा तसेच अन्य उपक्रमही परुळेकर यांच्या स्वयंसिद्धातर्फे चालविण्यात येत आहेत. आपापल्या क्षेत्रात सर्वोत्तम कामगिरी करणाऱ्या आणि तरीही त्यांच्या कामाची दखल न घेतलेल्या व्यक्ती, संस्था यांचा शोध घेऊन त्यांना फाउंडेशनतर्फे हा पुरस्कार देऊन गेल्या नऊ वर्षांपासून गौरविण्यात येत आहे. २००० मध्ये पहिला पुरस्कार बाळासाहेब कोळेकर यांना देण्यात आला होता. त्यानंतर आत्तापर्यंत मधुसूदन मिस्त्री (२००१), वीजी श्रीनिवासन (२००२), रतन कात्यायनी (२००३), विवेकानंद (२००४), गिरिजा सतीश (२००५), एन. राधा (२००६), डॉ. परमेश्वर राव (२००७) यांना सारडा समान संधी पुरस्कार प्रदान करण्यात आले आहेत.